الخروف الأخرس المتجمد

"الخروف الأخرس المتجمد" على وزن البحر الأبيض المتوسط كده...ليه خروف؟ علشان قدره كده. يعني العيد فرحة عند كل الأخوة البقر والجواميس وحتى الديوك الرومي، وهو يا حرام العيد عنده ورك وريش وفخدة وكبده وحلويات، وورق جرايد على أكياس بلاستيك، ويا تلاجة يا حلة، هو وبخته بقى.

يعني إمبارح كان الراجل الخروف ابن الحلال متأمع في الهدمة الصوف اللي حيلته وعمال يتنطط فوق السطوح، مقتنع إنه أقرب ما يكون للسحاب، وحاسس إن الدنيا كلها بتاعته، وكما قال الشاعر: "ما الدنيا إلا حقل برسيم كبير". وغنّى كل الأغاني اللي يعرفها واللي ما يعرفهاش، بالأبجدية بتاعته التي لا تحتوي إلا على حرفين، ميم وألف. وقرقض كل الحاجات اللي مبروط بها في عمود الإيريال، وقرر ينط من فوق السطوح، وراح ناطط واللي يحصل يحصل! وفجأة البدلة الصوف الإنجليزي تتحول لجناحات، والأبجدية تمتد من حرفين لـ400 حرف، يغني بهم كل المزيكا اللي اتخلقت في الدنيا، والهوا ما بقاش هوا، بقى خليط من ريحة الياسمين والصنوبر الجبلي، على شوية كوول ووتر. اختراق السحاب بيدي إحساس بالزغزغة والسُكر والفوقان في نفس الوقت، كإنه كوباية لاتيه آيريش كريم مظبوطة جاية بعد يوم عناء طويل. إحساس الرغاوي والقهوة إحساس عبقري، إحساس رائع بالحرية، مش مهم...ماهو بكره هيغرق في الملح والفلفل والليمون، ويبقى شريكه في الأوضة طبق جيلي عندي شلل رعاش مزمن.